Интервю

- Ислом, мавсумни қайси клуб сафида бошлайсиз? Бу борада якуний қарорга келдингизми?
- Ҳақиқатан ҳам, бу мавзуда жуда кўп гап-сўзлар бўляпти. Лекин ҳали якуний қарорга келмадим. Очиғи, қайси жамоа вариантини танлаш масаласида қийналяпман.

- Матбуотда «Бунёдкор», «Пахтакор» ва «Локомотив» клублари сизга харидор бўлаётгани ҳақида хабарлар бор...
- Ҳа. Ўзбекистондан шу уч жамоа менга қизиқиш билдиряпти. Ҳозир бу клубларнинг қайси бирига ўтиш ҳақида ўйлаяпман. Юрий Вазгенович билан маслаҳатлашиб, якуний қарорга келаман. 

- Қарор қабул қилишда яна ким таъсир ўтказиши мумкин? Агентми?
- Буни ўзим ҳал қиламан. Агентим фақат шартномани расмийлаштиришда ёрдам беради. 

- Араб клубларидан ҳам таклифлар борми?
- Агентимнинг айтишича, араблардан 2-3та жамоа бор. Лекин қайси клублар эканини сўрамадим. Улар билан алоқага ҳам чиқмадик. Миллий ва олимпия терма жамоаларимизнинг муҳим ўйинлари боис, бу мавсумни Ўзбекистон чемпионатида ўтказишим ҳақиқатга яқинроқ бўлиб турибди. Яқин кунларда масалага ҳал қилувчи нуқтани қўямиз. Чунки, 5 февраль яқин. Бир қарорга келмасам, бу ўйинимга салбий таъсир ўтказиши мумкин. Шуниси аниқки, қайси жамоага ўтишимдан қатъий назар, бир йилдан ортиқ шартномага имзо чекмайман. Агар имкони бўлганида, Европа клубларининг бирига ўтардим. Одил Аҳмедовга ўхшаб, ўз олдига катта мақсадларни қўядиган жамоада ўйнашни хоҳлайман. Лекин ҳозирча Россия клубларидан таклифлар келиб тушмади. 

- Футбол оммаси орасида шундай гап-сўзлар юрибдики, қарор қабул қилишингизда Вадим Абрамовнинг таъсири бўлиши мумкин экан. Бу ҳақда ўзингиз ҳам эшитгандирсиз?
- Вадим Карленович миллий ва олимпия терма жамоаларимиз манфаатини ўйлаб, маслаҳат бериши мумкин. Ҳамма мураббий ҳам ўз шогирдига яхшиликни раво кўради. Мисол учун, «Бунёдкор» ОЧЛда шарқ минтақасида ўйнайди, агар шу жамоа таклифини қабул қилсанг, Япония, Австралия, Кореяга бўладиган парвозлар сени толиқтириб қўйиши мумкин, деб маслаҳат бердилар. «Пахтакор»да ҳам шунга ўхшаш ҳолат. 

- Гапларингиздан шу нарса англашиляптики, ОЧЛда қатнашадиган жамоаларимиз сафига ўтмайсиз. Демак, «Локомотив» варианти қоляпти. Шундайми? 
- Йўқ. Ҳали бир нарса дейиш қийин. 

- Ўзингизга қайси вариант кўпроқ маъқул келяпти? Масаланинг молиявий томонини ўйлаяпсизми ёки..?
- Пул ҳақида ўйлаётганим йўқ. Айни ҳолатда мен учун кўпроқ терма жамоа манфаатлари устун. Агар «Бунёдкор» ёки «Пахтакор» вариантини танласам, бу жамоалар мени олимпия терма жамоасига қўйиб юбормасликлари мумкин. Шу боисдан, бу клублар билан алоқага чиқмадим. 

- Ҳар ҳолда, мавсумни «Локомотив»да бошлашингиз ҳақиқатга яқинроқ бўлиб турибди. Лекин бу клуб сизнинг савиянгиздан бироз паст эмасми? 
- Ҳали юз фоиз аниқмасу, лекин шунга яқинроқ... Жамоа янги мавсумни янги стадионда, янги бош мураббий қўл остида бошлайди. Таркибга тажрибали, кўзга кўринган футболчилар келиб қўшиляпти. «Локомотив» ҳам ўз олдига жиддий мақсадларни қўймоқда. Шундай экан, бу ўйинимда пасайишга олиб келмайди. Улар билан куни кеча ўртоқлик учрашуви ўтказиб, йирик ҳисобда ғалаба қозондик. «Локомотив» яхши таассурот қолдирди. Янги жамоанинг шаклланиши учун озгина вақт керак бўлади. 

- Юрий Саркисян сизни осонликча қўйиб юбормаса керак?
- Ҳали «Нефтчи» билан амалдаги шартномам тўла якунланмаган. Ҳар қандай ҳолатда ҳам, Вазгеновичнинг розилигини олиб, кейин кетаман. Балки қолишим ҳам мумкин. 

- Олдинда Лондон-2012 Олимпиадаси саралашининг ўта муҳим учта ўйини турибди. Шу кунларда давом этаётган терма жамоанинг йиғини ҳақида ҳам маълумот берсангиз. 
- Асосий эътибор жисмоний тайёргарликка қаратиляпти. Икки кун залда машғулот ўтказдик. Ўзбекистон футзал терма жамоаси билан ўртоқлик ўйинида майдонга тушдик. Олдинда Қувайт ва БАА миллий терма жамоалари билан ўртоқлик ўйинлари бор. БААда йиғин ташкил этилади. Халқаро турнирда қатнашамиз. Шу ўйинлар орқали 5 февраль куни Австралияга қарши кечадиган муҳим ўйинга тайёргарлик кўрамиз. Ҳозир гуруҳимизда қолган жамоаларга нисбатан бирозгина имкониятимиз юқорироқ. Барчаси ўз қўлимизда. ғалаба қозониб, мухлисларни хушнуд этишга ҳаракат қиламиз. Кейин ЖЧ-2014нинг ҳал қилувчи 4-саралаш босқичида ҳам муваффақиятли иштирок этиб, халқимизнинг орзу-истакларини рўёбга чиқаришимиз керак. Афсуски, Япония билан ўйинда (иккита сариқ карточка сабаб), жамоадошларимга ёрдам бера олмайман. Балки бу яхшиликкадир...

- Олимпиада саралаш гуруҳидаги барча жамоалар билан ўйнадинглар. Уларнинг қайси бири кучлироқ экан?
- БАА кучли. Улар билан бўлган ўйинда барибир аввалги икки мағлубиятни эсдан чиқара олмадик. Амирлик жамоасига Осиё чемпионати ва Осиё ўйинларида мағлуб бўлгандик. Лекин ишонаманки, Тошкентдаги ўйинда биз ўз сўзимизни айтамиз.

манба : “ИнтерФУТБОЛ” газетаси.