Анвар Бердиев: “Бу йил икки ҳисса куч билан ўйнаймиз”

«Нефтчи»нинг фидойи футболчиларидан бири ҳисобланмиш Анвар Бердиев мамлакатимизнинг тўпурар ўйинчилари қаторига киради. Бир неча йиллардан бери фарғоналиклар сафида ўйнаб келаётган ҳужумчи янги мавсумни ҳам “Нефтчи” таркибида бошлашга яқин турибди. Ўтган ҳафта Юрий Саркисян жамоаси баага жўнаб кетди. Сафар олдидан Анвар Бердиев билан учрашиб, бир қатор саволларга жавоб олдик.

- Анвар ака, ўтган мавсумдаги натижадан қониқдингизми?
- Ҳа, деярли қониқдим. Чунки биз 4-ўринни эгаллаб, ОЧЛ плей-офф босқичига йўлланмани қўлга киритдик. Қолаверса, сўнгги йилларда чемпионатимиз савияси ошиб, бу 4-ўринни олиш ҳам анчагина машаққат талаб қиляпти.

- Ўзингизни ўйинингиздан кўнглингиз тўлдими?
- Биласизми, олдинги йили жароҳат олганимда кўпчилик мени футболга қайта олмайди, деб башорат қилаётганди. Ҳатто муолажанинг илк кунларида шифокорлар ҳам шундай фикрда эди. Бунга ўзим ҳам ишониб бораётгандим. Лекин Худонинг ўзи мени яна майдонга қайтишимга имкон берди. Бунинг учун Аллоҳга шукрона айтаман. Ўз ўйинимдан ҳам қониқдим десам бўлаверади.

- Олдин “Нефтчи” фақат пешқадамликни кўзларди. Сўнгги йилларда бунга гувоҳ бўлмаяпсиз. Бунинг сабаби нима билан изоҳлаган бўлардингиз?
- Нимага шаъма қилаётганингизни билиб турибман. Мен “Нефтчи”да анча йиллардан буён фаолият олиб боряпман. Жамоа муҳитига мослашиб, ўйинчилар билан ака-укадай бўлиб кетдим. Шунинг учун ҳам айнан шу ерда тўп тепишни ёқтираман. Натижага тўхталадиган бўлсам унинг учун ҳамма масъул. Лекин ўзингиз ҳам кўриб турибсиз. Сўнгги йилларда чемпионатимиз савияси олдингига нисбатан анча ошган.

- Анвар ака, олий лигада жамоаларнинг нечта бўлишини хоҳлардингиз?
- Мен футболчиман. Вазифам футбол ўйнаш. Олий лигада 14та клуб қатнашса ўз-ўзидан 26та ўйин ўтказилади. Агар футболчи чемпионат давомида жароҳат олса, унга мавсум деярли якунланиши мумкин. Сабаби, футболчилар одам. Жароҳатдан фориғ бўлгандан кейин тикланиш жараёни ҳам анчагина вақтни талаб қилади. Бунга қадар мавсум ҳам охирлаб қолган бўлади.

- Фаолиятингиздаги қайси гол хотирангиздан алоҳида ўрин эгаллаган?
- (ўйланиб) Мен учун ҳамма гол ҳам бирдек аҳамиятга эга. Муҳими урган голим жамоага ғалаба келтирса бўлди. Ёдимда, жароҳатдан қутилиб, энди майдонга қайтганимда “Ал Садд” дарвозасини чиройли тарзда ишғол қилгандим. Айнан шу гол ўзимга бўлган ишончни ортишига хизмат қилганди.

- “Нефтчи” бу йил халқаро мусобақада иштирок этади. Сиз қайси турнирда қатнашишни хоҳлардингиз? ОФК Кубогими ёки чемпионлар Лигаси?
-  Сўзсиз Осиё чемпионлар Лигасида. Чунки бу мусобақада чемпионлар иштирок этишади. Ўз-ўзидан кўриниб турибдики, турнирда ҳар қандай баҳслар қизғин ва муросасиз кечади.

- Юбилей мавсумда мухлислар орзиқиб кутган натижалар қайтармикан?
- Олдиндан ваъда беролмайман. Бу – футбол. Унда ҳамма нарса бўлиши мумкин. Лекин шуни алоҳида айтиб ўтмоқчиманки, бу йил биз ўз мухлисларимизни хурсанд қилиш учун ҳар доимгидан икки ҳисса кўпроқ ҳаракат қиламиз. Бунинг учун ишқибозлар бизни қўллаб–қувватлаши зарур.

- Фарғоналик ишқибозлар бошқа минтақаларга қараганда футболнинг ашаддий ишқибозлари ҳисобланади. Уларнинг турли гаплари руҳиятингизга ўз таъсирини ўтказадими? Ёки бунга эътибор қилмайсизми?
- Албатта, таъсир қилади. Ахир мен атайин қилмайман-ку, ўша хатони. Гоҳида омад юз ўгирса, баъзисида ҳимоячилар эркин ҳаракат қилишимга тўсқинлик қилишади.

- Олий лига жамоаларида қайси ҳимоячи ҳақида илиқ фикр билдира оласиз?
- (ўйланиб) Илҳом Суюнов ҳамда Артём Филипосян кучли ҳимоячилар сирасига киради.

- Жамоадаги қайси ҳужумчи майдонда тез тил топишиб кетасиз?
- Охирги йилларда Алишер Холиқов билан бир-биримизни анча тушуниб ўйнаётгандик.

- Миллий терма жамоамиз хақида қандай фикрдасиз?
- Терма жамоамиз ўзига муносиб мураббийни топди деган фикрдаман. Вадим Абрамов миллий ва олимпия термамизга келгандан кейин ҳамма нарса ўзгарди.

- Нима деб ўйлайсиз Бразилияга бора оламизми?
- Худо хоҳласа. Мухлис сифатида буни тилаб қоламан.
 

Рўзали Қурбонов суҳбатлашди
 

Манба: «FutGOL» газетаси