JAMOAMIZDAN IRODALI G‘ALABA!

Uchrashuvining birinchi bo‘limi keskin kurashlarga boy bo‘ldi. Bellashuvning 3-daqiqasida hujumchimiz Alisher Odilovda gol urish uchun yaxshi imkoniyat paydo bo‘ldi, lekin zarba noaniq ketdi. 8-daqiqada esa mehmonlar penalti tepish huquqini qo‘lga kiritishdi. Yovan Jokich to‘pni boshi bilan qaytarishda xatoga yo‘l qo‘yib, qo‘li bilan o‘ynadi. «Buxoro» sardori Xurshid Muxtorov nuqtadan adashmadi va hisobni ochdi — 0:1. Shundan so‘ng vakillarimiz katta bosim o‘tkazgan bo‘lsa-da, bo‘lim yakuniga qadar raqib darvozasini ishg‘ol eta olishmadi.

Uchrashuvning ikkinchi bo‘limi to‘liq «Neftchi» futbolchilarining nazorati va katta ustunligi ostida kechdi. Vakillarimiz raqib darvozasi oldida ketma-ket xavfli vaziyatlarni yuzaga keltirib, bosimni tinimsiz oshirib borishdi. Biroq, muxlislar intiqlik bilan kutgan gol o‘yin yakunlanishiga sanoqli daqiqalar qolganda sodir bo‘ldi. Bahsning 81-daqiqasida Stipe Perisa qulay imkoniyatdan unumli foydalanib, raqib posboniga hech qanday imkoniyat qoldirmadi va kuchli hamda aniq zarbasi bilan muvozanatni tikladi — 1:1.
Goldan ruhlangan yigitlarimiz hujumkorlikni yanada kuchaytirishdi va raqibni butunlay o‘z jarima maydonchasiga qamab qo‘yishdi. Bunday tinimsiz bosim tez orada o‘z mevasini berdi: 87-daqiqada mahoratli yarim himoyachimiz Jamshid Iskanderov raqib mudofaasidagi bo‘shliqdan foydalanib, jamoamizning ikkinchi to‘pini kiritdi va stadionni larzaga keltirdi — 2:1! Qaltis vaziyatda iroda ko‘rsatgan futbolchilarimiz ushbu g‘alabali hisobni o‘yin yakuniga qadar saqlab qolishdi. Bu qimmatli uch ochko jamoamizning turnir jadvalidagi yetakchilik o‘rnini yanada mustahkamladi

SUPERLIGA
16 iyul 12-tur
Farg‘ona shahar, "Istiqlol" stadioni soat 20:00
"NEFTCHI" 2:1 "BUXORO"
Gollar: Hurshid Muxtorov, 8' pen(0:1), Stipe Perica, 81'(1:1), Jamshid Iskanderov, 87'(2:1)

Bosh hakam: Ahrol Risqullayev
Yordamchi hakamlar: Alisher Usmonov, Baxtiyorxo‘ja Shavkatov
Zaxira hakami: Nurbek Sheraliyev
VAR: Asker Najafaliyev
AVAR: Xusan Hudoyberdiyev
Nazoratchi: Aleksandr Popov
Komissar: Jalolxon Inoo‘omxo‘jayev

"Neftchi": 1.Botirali Ergashev, 2.Izzatillo Po‘latov(34.Farrux Sayfiyev,46), 4.Boyan Siger, 5.Ikrom Aliboyev, 6.Ibrohim Halil Yo‘ldoshev, 7.Abrorbek Ismoilov, 8.Vladimir Yovovich(9.Hurshid G‘iyosov,66), 21.Muhsinjon Ubaydullayev(77.Ratinyo,46), 22.Alisher Odilov(10.Jamshid Iskanderov,46), 23.Yovan Jokich, 32.Zoran Marushich(18.Stipe Perica, 74),

Zaxiradagilar: 45.Akbar To‘rayev, 11.Asilbek Jumayev, 20.Anvarjon Gʻofurov, 27.Nurbek Sarsenbayev, 30.Rustambek Fomin

Bosh murabbiy: Islombek Ismoilov